Новосибирскойсэ ютась Россиянь раськетнень национальной литературань IV-це фестиваль

Материал из Викиновостей, свободного источника новостей
Перейти к навигации Перейти к поиску
Geographylogo.png Лия кельтнесэ: русский • эрзянь
Россиянь раськетнень национальной литературань IV-це фестиваль. Новосибирск.

Новосибирск ошсо ютась Россиянь раськетнень национальной литературань IV-це фестиваль. Сонзэ бажамодонзо ушодовоманть икеле ёвтнесь Фестивалень пресс-службань прявтось Антон Веселов:

«Программасонть алкуксонь дивань номерт. Меремс, национальной поэзиянь джемсэнть, рузонь ды азербайджанонь кельтнеде башка, кармить гайгеме мокшонь, кабардинэнь, абазинэнь ды сибирень пилентень апак тонадово лия кельть. Фестиваленть бажамозо – марямс, ванномс кельтнень «тевсэ», марямс географиянть ды валонь морамонть, максомс фильматненень, стихтненень ды моротненень, смустте башка, лия уликсчияк (измерения) – сехте сэрей мазычинь.»

Икелень колмотне ульнесть Московсо, Казаньсэ, Нижней Новгородсо. Культурань ды оймсемань «Победа» центрасо невтевсть-гайгевтевсть малав комсь раськень кельть, конатнесэ сёрмадовить художественной произведеният, нолдавить книгат ды журналт-газетат, снимавить фильмат, касы-кепети сценической искусствась.

Эрзятнень ды мокшотнень пельде тов якасть Т. Мокшанова ды Н. Голенков.

Фестиваленть официальной панжомадо мейле ютавтовсь, кода сонзэ лемдизь, раськень поэзиянь джем, косо апак лотксе мельга мельцек ловновсть авторонь стихть абазинэнь, алтаень, башкирэнь, бурятонь, ингушонь, кабардинэнь, мансинь, мокшонь, ненецень, табасаранонь, удмуртонь, хакассонь, хантынь, черкесэнь, чеченэнь, эрзянь, якутонь ды дербенттнэнь азербайджанонь кельсэ.

Мейле Фестивалень тевтне вешкане ютасть колмо залга: «Основной сцена», «Лекторий», «Кинозал». Весе читнень перть важодсь книгань ярмунка, косо книгатне микшневсть сядо целковойде ды рамамост кисэ мик максневсть эрьва кодат вишка казнеть — седеяк покш мельспаронь теемга.

Россиянь раськень литературань фестивальтнестэ эрьвась мейсэяк явови икеле ютазденть. Неенсесэнть вана поэттнэ эсь биографиянь ёвтнемадо ды стихень ловномадо башка, ульнесть лекторокскак. Лекциятнень пингстэ эрьвась сюпалгадсь лия раськень культурань содамочисэ. Весе содавтсть фестивалев сазтнень эсь раськень литературанть чачома-касома кинзэ марто, мейле седе келейстэ панжсть кодамояк тема. Н.Голенков, меремс, ёвтнесь художественной произведениятнень мокшонь кельстэ рузонь кельс ютавтома стакачитнеде, Т.Мокшанова — эрзянь кельде, культурадо, эрямо койтнеде ды раськень оршамопельтнеде:

«Мон а стяко истя оршнезян, – мерсь Татьяна, кедьсэ викшнезь оршамопелензэ невтнезь, – аволь секс, мекс те Фестивалесь свал ютни истя мазыйстэ (тердезтне яла раськень оршамосот), мон течи невтнян эрзянь оршамопельть, ускинь мартон омбоце комплекткак: кунсолыця тейтертнень ютксто киньгак карман оршневтеме эрзякс ды келейстэ ёвтнеме костюмонь эрьва пельксстэнть.»

Новосибирскойсэ раськень литературатнень фестивалесь аволь ансяк таго невтинзе литературань, кинофильмань ды моронь тюсовчинть-ламочинть. Сонзэ сех сэрей бажамотнестэ вейкесь — лездамс раськетненень келест ды литератураст ванстома тевсэнть, келейгавтомс литературатнень ютксо сюлмавкстнэнь.

«Неть кевкстематнень топавтомасо аштеськак Новосибирскойсэ фестиваленть вешемазо, кода вешемаст ютавтозь ды икелепелев арсевиця истямо жо фестивальтнень, конатнень ютавтни Россиянь раськетнень национальной литературатненень лездамо программась»
, — тешкстызе «Грозный-информ» Информационной агенства марто кортницясь, Фестивалев тердезесь, ЧР-нь сёрмадеень вейсэндявксонь правленияс совицясь, содавикс поэтэсь ды кельстэ кельс ютавтыцясь Адам Ахматукаев.
 
 

Источники[править]

Оригинальный репортаж

Эта статья опубликована в Викиновостях и содержит эксклюзивный репортаж и исследования, написанные одним из участников нашего проекта специально для Викиновостей.

Если автор репортажа не указал свои источники, источником информации является он сам. Вы можете узнать, кто создал эту статью, из истории статьи: найдите в ней самую первую правку; тот, кто её внёс, и является автором статьи. Если у вас есть замечания или предложения, первым делом напишите о них на странице обсуждения. Если у автора имелись в распоряжении не все факты, дополните статью известной вам информацией. Если с течением времени ситуация изменилась, напишите о новых фактах в новой статье. Если у вас есть вопросы к участникам русских Викиновостей, напишите на форум.
 

Комментарии[править]

Викиновости и Wikimedia Foundation не несут ответственности за любые материалы и точки зрения, находящиеся на странице и в разделе комментариев.