Эрзянь Одпичевелентень 250 иеть

Материал из Викиновостей, свободного источника новостей
Перейти к навигации Перейти к поиску
Geographylogo.png Лия кельтнесэ: русский • эрзянь

7 декабря 2017

Морыть инжеть — «Масторава» морыцятне Самар ошсто. Покшчись, алтазь Самара ёнонь, Клявлянь буень Одпичевелень кавтосядт ведьгемень иень путоманзо эйстэ. 2017 иень сундерьковонь 25 чи.

2017 иень сундерьковонь 25 чистэ Самарань ёнксонь Клявлянь буень Одпичевелесэ покшчи Велень чи «Минек вишка тиринь таркась — тиринь веле», кона ульнесь алтазь веленть 250-це чачома иестэнзэ.

Покшчинть официальной пельксэсь ушодовсь цецянь путомасто кеврунгонтень, чавовозь велестэ ушмодейтненень, сетненень кие эзь велявто Ине Отечествань Торпингестэнть (1941—1945 ии.). Те кеврунгось ашти велень клубонть вакссо. Одпичевелестэ торпингентень тусь 409 ломанть, эйстэст Тиринь Моданть идемстэ маштовсть 298-тне, сынст лемест сёрмадозь лецтнема кевлазтнэсэ. 111 ломантне велявсть кудов изницякс, ансяк кулость торпингенть прядомсто пек стака сэретькстэ ды ормадо. Неень шкасто, велесэнть эзь кадово вейкеяк торпингень улий. Велень эрицятне лецтить валдо валсо весе ушмодейтнень, кие путызе прянзо минек вейсэнь изнямонть кис.

Цецянь путома кеврунгонтень чавовозь велестэ ушмодейтненень, кие эзь са Ине Отечествань Торпингестэнть (1941—1945 ии). Покшчись, алтазь Самара ёнонь, Клявлянь буень Одпичевелень кавтосядт ведьгемень иень путоманзо эйстэ. 2017 иень сундерьковонь 25 чи.

Знярыя сядот ломанть велень эрицят, буень ды Самарань ошсто инжеть пурнавсть Одпичевелень клубонть кузтемпесэ. Инжетнень кшесэ ды салсо вастасть «Килейне» раськень морамо кужонть эрзяватне.

Ирина Петрова, фотоньтеий (Самар ош):

« Ванмо таркась ульнесь пешксэ, ансяк ломантне сыльть ды сыльть. Истя зняро ломанть умок эзть ульне тесэ, истя мериль эрьвась. Велень ды буень прявтнэ шнызь ды казизь важодеманть кисэ эрицятнень. Вейке минутань каштмолемасо ледстизь чавовозь торпингесэнть. Ёвтнесть веленть историядонть, сыре ломантне ёвтнесть мезе содыльть икелень эрямодонть. Ванныцятне мельспаросо кадовсть велень ды «Масторава» самарасто морыцятнень эйстэ, сынь морасть ламо эрзянь морот баян марто ды сонтемензэ. Пек цяпазь ды мельспаросо вастасть морыцятнень, кие чачсь те таркастонть, клявлинасто - хоронть морыцясь Нина Черных ды Вячеслав Измаиловонь. Валентина Иванова, овсе саемс, Одпичевелстэ. »

Клубонть потсо ульнесь мазылгавтозь ды ульнесь весень туртов невтезь эсь кедьсэ эрьва мезе теезь невтемась. Моргань лангсо ульнесь невтязь раськень ярсамопельть: чапамо ловцо, пачалксеть, «Масторавань» морыцятне каванясть сазь инжетнень алкуксонь ды тантей позасо. Валентина Иванова, «Масторава» морамо кужонть улиця (Самар ош):

« Весемекс «Масторавась» морась 22 морот. Заводинек «Колмо штатолт» моросонть, прядынек «Сюконятано те кудонтень». Тень улемс те покшчистэнть – пек покш ды кенярдыця тев. Те тиринь велем, тесэ мон чачинь ды касынь, тесэ эрить ялгамгак, свал сан тей кода кудов. Чачома чи марто, тиринь велем!!! Мелезем мезесь тусь – састь знярыя сядот ломанть, кода кие-бути мерьсь «зяро ломанть минек клубсо колияк арасельть». Те ёвты велень чачома чизэ – те Покшчи. »


Петрянь Андю, Россиянь куляньсёрмадеень Кужос совиця (Петра ош):

« Кода Одпичевелес чачиця, мон каштанксчисян, велень эрицятнень пурнамонть кис ды вадрясто сонзэ ютавтызь. Пек васолмась ды важодемась эзь максо улемс мартонк те покшчисэнть, ансяк ойме марто ульнинь мартонк. Мельспаросо, Ирина Петровань теезь фотокувтнесэ, неинь «Килейне» раськень морыцятнень, ды лецтямост весень кие не кемень иетнэнь перть морасть эйсэнзэ, сынст эйстэ ульнесть ламо. Прасковья Фёдоровна Иванова (Петрова) монь бабам ламо иеть морсесь кужосонть. Вадрясто прясо кирдян сынст кортамост ды морамотнеде мель ёвтамотнеде. Мон ванстат ютазь пингенть раужо-ашо фотокувтнэнь, бабань эрзянь раськень оршамонзо, пулайенть марто, конанень пингеде седе ламо, ды бабань карсезь ды яказь картне. Тердян весе тиринь велень эрицятнень тешкстамо минек веленть историянзо. Те минек икелень шканок, сонзэ лецтямонзо теме арась неень шкань эрямось минек ды минек пакшатнень! Видстэ мерян, кияк Одпичевелестэ эзь ловно пек вадрясто сёрмадозь минек веледенть ды колхозонть эйстэ ютазь пингенть 30-це иетнестэ. «Ленинэнь киява» кулялопасонть (кона лиснесь малав 9 иеть Клявлясо) эрзянь кельсэ сёрмадозь ды невтезь ламо буень-лемть ды эрямостонть сёрмадовкст. Мон неинь-ловнынь не кулялопатнень, сынь вадря таркасо Российянь Раськень Библиотекасо Петра ошсо. Ды монь мелем эряви теемс копият Одпичевелень музейс. Тень мон тейса. Тердян весенень вешнемс кудонь архивтнесэ ды муемс фотокувт, кулялопань сёрмадовкст, лия конёвт, ды седе тов ды седе тов. Эли сёрмадомост ледстямотнень, конатат кармить путозь Одпичевеленть историнь лувокс. »


Васенцеде Одпичевеледенть лецтямось саеви 1767 иестэ кода Сосновка веле. Истя жо Сосны веледенть сёрмады академикесь И. И. Лепехин, кона 1768—1772 иетнестэ якась Уралонь Масторга ды Равганть (Поволжьява), ды ютакшнось Самар ёнкскаяк. Ансяк, маряви, минек кезэрень покштянок-бабанок эрясть тесэ седе икелеяк. Эряви вешнемс теде ледстнемат Самарань ды лиянь архивтнесэ. Клявлинань архивсэ Одпичевеледе даннойтне улить 1859 иестэ саезь: «Новые Сосны велесь (государственной). 1859 ие: 75 кардазт, эрицятнеде 600 лом., эйстэст 289 цёра лом. ды 391 ава лом.. Раськень коряс — эрзят».

 

Лисьмапрят[править]

 
Комментарии[править]
Викиновости и Wikimedia Foundation не несут ответственности за любые материалы и точки зрения, находящиеся на странице и в разделе комментариев.
 


 


 
Нолдамс