Эрзянь валморозеесь Людмила Рябова казязь омбомасторонь литературань казесэ

Материал из Викиновостей, свободного источника новостей
Перейти к навигации Перейти к поиску
Geographylogo.png Лия кельтнесэ: русский • эрзянь

14 ноября 2018

Эрзянь валморонь сёрмадыцянть Людмила Рябовань «Кие тон?» валморонь пусмозо сайсь литературань премия Эстэнь Масторсо.

Эрзянь валморозеенть Людмила Рябовань («Сятконь» ковставксонть важожиесь) валморонь «Кие тон?» од пусмонть невтемась. Саран ош, «А. С. Пушкинэнь лемсэ Раськень библиотекась», 2017 иень ожоковонь 25 чи.

Сонзэ теицянзо-арсицянзо – Эстониянь образованиянь ды наукань министерстватне ды Финнэнь-угрань литературатнень ассоциясь. Малавикс раськетнень программанть лувсо сынь кемгавтовоцеде кочкасть уралонь кельтнесэ сёрмадозь сехте паро произведеният.

Пелькстасть маринь, удмуртонь, коминь, эрзянь ды вепсэнь кемголмово сёрмадыцят. Вейке казненть сталмо-питнезе 1 250 еврот. Тедеде изницятнеде кавто.

Людмила Рябовань валморонь пусмодонзо башка тешкстызь маринь сёрмадыцянть Елена Юнусовань эйкакштнень туртов «Кугезе калькулятор» («Покштятнень-сырькайтнень калькулятор») книганзо.

Людмила Рябова истят валт мерсь казненть марто:

«Максы васняяк мельспаро, мекс редимизь, тешкстымизь, куш тосо. Ярмаконть арсян кадомс сы шкань пусмонь нолдамс, анокстан эйкакшонь пусмо. Юнусовань Еленань эзия ловно. Бути сави мартонзо вастовомс, вешан мезеяк эрзякс ютавтомга.»
Корты Людмила Рябова. Эрзянь валморозеенть Людмила Рябовань валморонь «Кие тон?» од пусмонть невтемась. Саран ош, «А. С. Пушкинэнь лемсэ Раськень библиотекась», 2017 иень ожоковонь 25 чи.

Эрьга, весе вейсэ арсетяно эрзянь поэзиянь валдодояк валдо тештентень седе товгак кенярдовтомс минек од сёрмадовкссо ды сюпалгавтомс тиринь литературанть! Ды кадык истят вадря книгатненень путыть покш питне аволь ансяк минек масторонть томбале – тескеяк!

Алина Подгорнова, эрзянь валморозей:

«Монь койсэ, те изнявксось путови аволь ансяк Людмила Рябовань шкинемань паргинес, сон канды лезэ целанек эрзянь литературантень. Аламо ютавтневить пелькстамот, конатнесэ путови питне эрзянь кельсэ сёрмадовкстнэнень. Кодат вадрят сынь иляст уле, мель тенст а явови, сынь прок арасть. Вана истят пелькстамотне невтить: улить алкуксонь паро сёрмадейть, конатнень шкинемаст эряви тешкстамс, лемест – гайгевтемс. Людмила Рябовань лемезэ содавикс ловныця эрзятнень туртов. Кадык те изнявксось кепедьсы сёрмадомань мелензэ, кадык поэзиянь толгазо карми седеяк пшти ды видечинь пачтиця!»


Римма Жегалина, эрзянь келень тонавтыця:

«Мон покш каштанчисан Людмилань кис ды минек эрзянь поэзиянть кувалма. Лован Рябовань валморотнень сехте виевекс ды сэреекс ёрокчинь коряс. Сеедьстэ ловнан сонзэ валморонь пусмотнень ды оймем свал пешкеди мельспародонть. Арсян Людмиланень од изнявкст, кадык шкинемань сёлмонзо кепедить эйсэнзэ верев седеяк сэрей тёкшос.»


Литературань казненть Малавикс раськетнень программанть Эстониянь образованиянь ды наукань Министерствась яволявты суньдерьковонь 1 чистэ, те ледстнема чи, зярдо ульнесь ледезь Кузебай Герд, удмуртонь сёрмадеесь.

 


Лисмапрят[править]


 

Комментарии[править]

Викиновости и Wikimedia Foundation не несут ответственности за любые материалы и точки зрения, находящиеся на странице и в разделе комментариев.