90 иеть Мордовской автономной областень теевеманень ды 60 иеть С.Д.Эрьзянь лемсэ музеентень

Материал из Викиновостей, свободного источника новостей
Лия кельтнесэ: русский • эрзянь

17 января 2020 года

2019 иень якшамковонь 10 чистэ 2020 иень якшамковонь 10 чистэ топодить 90 иеть Мордовской автономной областень теевема шкасто ды секе чистэ 60 иеть, кода панжозель Мордовской республикань артомань шкинеманень алтазь музеесь С. Д. Эрьзянь лемсэ.

2020 иень якшамковонь 10 чистэ топодить 90 иеть Мордовской автономной областень теевема шкасто ды секе чистэ 60 иеть, кода панжозель Мордовской республикань артомань шкинеманень алтазь музеесь С. Д. Эрьзянь лемсэ.

Неень шкас лововсь: эрзятнень ды мокшотнень арасель эсь вийкирдий системась (руз.государственность) ХХ пингес. Ансяк улить лият кортыцяткак, конат невтить чинь-озамо Европань ёнксонь XIII пингень историктнень лангс. Сынь кортыть кавто эрзянь-мокшонь инязордо. Рузонь летопистне сёрмадыть «w:Мордва Пургасова» ланга эли «w:Пургасова волость» ланга. Инязорокс тосо аштесь Пургаз, моданзо ульнесть Теша ды Мокша лейтнень ютксо (эрицятне — эрзят).

Мокшотне невтить Нарчатка лангс (мокш. Нарчат) (кулось 1242?) — ёвтнематнень коряс сон ульнесь буртасонь (лия лисьмапрянь коряс — мокшонь) инязоравась. Сёрмадовкссо сонзэ лемезэ а мукшнови, а вастневи. Ёвтнематнень коряс, сон ульнесь Пуреш — мокшонь инязоронть тейтерь, Атямасонь ялакс. Нарчатка пурнась ушмо ды каятотсь монголтнэнь лангс 1242 иестэ удалдо ды тейсь ламо зыян тенст. Мейлень шкань тортингекс кармась Золотарёвонь покш туремась. Наровчат веле вакссо (Пензань ёнкс) Нарчатканень стявтсть кеврунго (памятник).

1920 иетнестэ, Гражданской ойнань прядомадо мейле кармасть арсеме национальной автономиянь теевемадо. Эрзятне ды мокшотне путсть ламо вийть те ойнасто большевикень кисэ. Секень коряс од административной модантень арсезевсть максомо истят модат, косо эрить сехте ламо эрзят-мокшот. 1920 иетнень самс эрзят-мокшот эрясть 25 губурниява. 1925—1928 иетнестэ Пензань, Обран ошонь, Саратовань ды Ульяновской губерниява тейнесть 30 мокшонь ды эрзянь волостть.

1930 иестэ якшамковонь 10 чистэ Мордовский округось ульнесь велявтозь Мордовской автономной областекс. 1934 — теевсь Республикась. Арсезевсть теемс истя: улевельть од масторсо седе ламо эрзят-мокшот. Текень кувалт кой-кодат административной таркат рузонь эрицятне марто Мордовской округсто максозельть шабра модас. Ды мекев ланк: Мордовской автономной областев совасть Обран ошонь лембе ёнксонь таркат, косо эрясть ламодояк ламо мокшот-эрзят. Васенцеде прявтошокс теексэлизь Темниковонь. Секс мекс те ульнесь сехте кезэрень Республикань ош. Ансяк арасель сонзэ чугункань кись. А Саранскоень — ульнесь. Секскак теизь Саранскоень прявтошокс.

Республикань чачома юртнэсэ аштесь Васильев Тмофей Васильевич, сон эрзя. Од Советэнь Республикань дипломат ды юрисконсульт Лондонсо. Низэ ульнесь — Рябовонь раськестэ. Рябовонь Анатолий ды Рябовонь Владимир — ялаксонзо. Мейле сынь колмонест ульнесь ледезь ды нист понгсть лагерьс.

Теке жо чистэ — якшамковонь 10 чистэ — топодить 60 иеть Мокшонь ды эрзянь республикань артомань шкинеманень алтазь музеентень С. Д. Эрьзянь лемсэ. Тосо пурназь Эрьзя скульпторонь шкинемась. Омбомасторсо сон содавиль «Рузонь Роден» лем ало. Неень шкасто аламот содыть Эрьзядо.

«Эрьзя» — это салавань лем (псевдоним), конанть Нефёдов С. Д. Саизе эстензэ. Те невти, кода вечксь сон эсь тиринь масторонть. Те ульнесь революциядо икеле, зярдо арасель эрзянь келень сёрмадома лувт, секскак сёрмалесь сон чевте знак марто од лемензэ. Сеэте содавикс шкинемазо — «Моисей».

Секень марто музейсэ важодицятне лембестэ кундызь васенце музеень прявтонть лемензэ — Софья Сергеевна Лебедевань. Сон сась музеень стявтомо од тейтерекс. Ленинградонь Художествань академиядо мейле. Эризе Ленинградонь блокаданть. Ды нать те лавшомгавтызе сонзэ шумбрачинзэ. Эряви мельсэ кирдемс, что се шкане Эрьзя аволь пек умок велявтсь кувать омбомасторсо эрямодо мейле. Сонзэ лемезэ 1940 иетнестэ эзь вастневе. Ды ламот вансть лангозонзо беряньстэ велявтомадо мейлеяк. Од тейтеренть сатотсть вийть ды апелеме тень весе кепедемс. Софья Сергеевнань нурькине эрямозо кадсь цитниця тешкс Республикань историясо. Истя лиссь, что калмазьдяк аштить маласо: Эрьзя ды Софья Лебедева.

Ссылки[править]

Комментарии[править]

Викиновости и Wikimedia Foundation не несут ответственности за любые материалы и точки зрения, находящиеся на странице и в разделе комментариев.