UG EZY: Вики-якамо Выборгов ды иень прядоматевень ванномась

Материал из Викиновостей, свободного источника новостей
Перейти к навигации Перейти к поиску
Geographylogo.png Лия кельтнесэ: русский • English • эрзянь

2021 иень якшамковонь 14 чись

В этой статье упоминается Фонд Викимедиа, какой-либо из его проектов или люди, имеющие к ним отношение. Викиновости — один из проектов Фонда Викимедиа.

UG EZY — «Эрзянь кельсэ Викимедиянь витнийть-петнийть» юзер-кужось ютавтсь 3 чинь вастовома, конанть перть тейсть Выборгов вики-якамо, «Ойме» морамокужонть прявтветицянть марто «прянь яжамот» ды ютазь 2020 иень тевтнень ванномат.



Вастовомасто арсемась сась превс апак учо, Од — 2021 иеденть икеле, Московсто гайневтсь «Ойме» морамокужонь прявтморыцясь Ежевики Спиркина: «а паряк монень самс Ине-Петрань ошов?» Те малава коень кевкстема весе ломантненень, конат эрить Московсо, Од иень самодо икеле. Секс, аволь пек куватьс арсезь, ульнесь мерезь «сак!»

Самолётось озась 2021 иень якшамковонь 1 чистэ чокшне, ды якшамковонь 2 чистэ валске марто 6 чассо вишка колмо ломанть чийсь комадо Ине-Петрань ошонь Финнэнь вокзалов Выборгонь поезд лангс, коенть коряс шкась поездэнь туемас лиядокшнось аламо. UG EZY кужонть прявтось невтизе вадрясто прянзо истямо тевсэ: кода метрова чиемстэ рамамс мобилка вельде колмо поездэнь билетт. Ансяк текень кувалт кияк эзь позда.

Мекс ульнесь кочксезь Выборг ошось? Тевесь сеньсэ: весе ломанень якамо таркатне ды музейтнэ Ине-Петрань ошсо ульнесть пекстазь од иень оймсема читнестэ. Ды пек ламо Ине-Петра ошонь эрицятненень сась превс мель ардомс Выборгов, косо весе таркатне ульнесть панжадо. Секс, обид шкас Выборгсо пурнавсть пек ламо туристт: пек ламо ломанть аштесть ушосо — учость Иневанькс Олафонь башняс совамо, истяжо ламо ломанть учость ушосо эрьва кафеc совамо, истя ламо якицят Выборгонь Крепостной курова нать зярдояк арасельть.

Вадрясто тевесь лиссь сетнень, конат састь самай валске марто: якасть-пакасть чаво ошка, састыне симсть чайть-кофеть ды апак учо понгсть Олафонь башняс, мезе а мерят сетнеде, конат састь обид шкава. Те башнясь UG EZY кужонтень ульнесь мель вешиця тев, секс мекс кой-кить эрзянь келень кужонть башка совить «Вики-краеведы Северо-Запада России» кужос. Те башнясь ашти культурань тевкадовксонь объектэкс ды зярыя шка удолов ульнесь витнезь-петнесь: лиясь прядомс потмо кудотнень витнема ансяк.

Минек кортавтома кужось якась краеведческой музейс, конась ашти башнянь потсо. Эряви меремс музеесь эрьвакодамоёнксонь: тесэ невтелма, конась алтазь Выборгонь икелень шкань эрицятненень — карел мезнень, Швеция Масторонть инязорчинтень Выборгсо, археологиянь коряс чувоматненень, картат, финнэнь шкадо Выборгсо, Советэнь-финнэнь торпингентень ды финнэнь ломантнень Выборгсто туемантень, Ине Отечествань Торпингентень ды энатой флоранень ды фаунанень. Эряви явомс мель, пертьпельксэнь невтелмасо весе аттрибуциясь максозоль рузонь ды финнэнь кельсэ. Мейле ульнесь башнянть потсо стака верев куземась, потмовитнема таркатне апак прядт. Ошонть сехте покш таркасто ульнесть теезь ошонь фотокувт. Не фотокувтнэ кармить совавтозь «Вики любит памятники» ды «Вики любит фольклор» пелькстамос.

Пешксе ломанде кафетнес а совават ды савсь ярсамс мезе ульнесь эрьванть марто кудос совамо таркасо. Теде мейле кужось таго лытась ошка ды снимсемь витнезь-петнезь мазый кудот. Мейле сыргасть вокзалов, тосо уш учось поезд, конасонть занязть меельце кавто таркатнень. Седе мейле сыцятне ардсть стядо.

Омбоце чись — 2021 иень якшамковонь 3 чись ютась «Ойме» эгиданть ало. Те сазь иесь сыненс — юбилейной. Прявтморыцясь ёвтнесь тенек мезе арси теемс сазь иестэ: теемс Владимир Осинскоень морамостудиясо суоминь-угрань проект, козонь тердемс од морыцят ды теемс марост морамо трек: педе-пес, те вадрясто лезды од морыцятненень невтемс эсь пряст. UG EZY кужось морамс а моры, а лездамс фольклоронь экспедициянь расшифровкасо — лезды. Ансяк юбилеень теемась веши ярмакт, эряви мелявтомс косто сынст саемс. Весе истят тевтне пурнавить краудфандингсэ, те истямо платформа, косо улить ламо морыцят-седицят. Истяжо улить арсемат записямс эрзянь кельсэ ёвкст вадря студиясо. А паряк теемс нурькине пидемань-панемань эрзянь ярсамонь тонавтома курсат? А мекс бу а теемс истят жо курсат тейтерьавань эрзянь коень коряс мазылгавтомат? А бути теемс финнэнь-угрань фольклоронь он-лайн архив? Пурнавозь фотокувтнэнь фольклоронь экспедициясто, сцена лангсо морамсто паряк эряволь невтемс фотокувонь невтелмасо. А мекс бу а теемс вишка видеороликст Instagram койсэ, саемга эрзянь келень коряс? Ламо арсемат чарасть кортамсто?

Истяжо ульнесь ваннозь юзер-группань статистикась лопань сёрмадомань коряс, вики-пелькстамотнесэ прянь невтемась: «Вики вечки кеврунгот» ды «Вики вечки фольклор». Ульнесь ютавтозь Zoom-вастовома лия кужонь улицятнень марто, конатне эрить лия ошсо ды лия масторсояк. Кевкстематнень ютксо кортазель седе, кода тердемс од улицят кужонтень, сыця Вики-якамот ды сынст стакачить COVID-19 кезовксонть шкане.



Вастовоманть колмоце чись — 2021 иень якшамковонь 4 чи — ульнесть сёрмадозь memo ды инжесь тусь ливтязь мекев, Московов. Маряви пек жаль, мекс кой кить эсть само вастовомо сэредемань кувалт.


Источники[править]

Оригинальный репортаж
Эту статью написала Vaija специально для Русских Викиновостей. Она содержит ранее не публиковавшиеся материалы или исследования, источником которых является сам автор. Статью проверил и опубликовал редактор Александр Красоткин (Krassotkin). Вы можете свободно без согласования и выплаты вознаграждения копировать, распространять и изменять эту статью в любых целях, включая коммерческие, однако вы обязаны указать автора, источник и лицензию. Например, так: Vaija, Александр Красоткин; Викиновости; CC BY 2.5. Вы также должны обозначить изменения, если таковые были сделаны. Лицензии изображений уточняйте на их страницах на Викискладе.

Комментарии[править]

Викиновости и Wikimedia Foundation не несут ответственности за любые материалы и точки зрения, находящиеся на странице и в разделе комментариев.