Финн-йӧгра войтырлӧн VII ставмирса конгресс

На других языках: русский • эрзянь • коми

16 июня 2016 года

2016 вося лӧддза-номъя тӧлысь 15-17 лунъясӧ финляндияса Лахти карын мунас Финн-йӧгра войтырлӧн 7 ставмирса конгресс. Шӧр темаыс - “Финн-йӧгра мир зумыд сӧвмӧмӧ”. Мероприятиеӧ пырӧдчасны 500 морт: финнъяс, эстъяс, венгръяс, саамъяс, квенъяс, сето, ливъяс, карелъяс да тверса карелъяс, вепсъяс, ингерманландечьяс, ижора, коми, коми-пермякъяс, яранъяс, хантъяс, водь, манси, нганасанечьяс, энечьяс, селькупъяс, удмуртъяс, мокша, эрзя да мариечьяс. А сідзжӧ Норвегияысь, Шотландияысь, Великобританияысь, Латвияысь корӧм йӧз, ЮНЕСКО да ООН, власьт петкӧдлысьяс, культураын да наукаын зільысьяс. Финн-йӧгра войтырлӧн VII ставмирса конгрессӧ пырӧдчасны Финляндияса Президент Саули Ниинистё, Эстонияса Президент Тоомас Хендрик Ильвес, Венгрияса Президент Янош Адер да Россия Федерацияса культура министрӧс вежысь Александр Журавский. “Финн-йӧгра войтыр зумыд сӧвмӧмӧ” медшӧр доклад лыддяс Финляндияса велӧдан да наука министр Санни Грахн-Лаасонен. Финн-йӧгра войтырлӧн консультативнӧй комитетӧн веськӧдлысь Валерий Марков вӧчас кывкӧртӧдъяс нёль вося уджысь. Конгресса участникъясӧс чолӧмалас Лахти карса мэр Юрки Мюллювирта.

Конгрессын видлаласны финн-йӧгра войтыръяслӧн кывъяс, культура видзӧмкӧд да сӧвмӧдӧмкӧд, вужвойтыр да ичӧт лыда войтыр инӧдъяскӧд йитчӧм юалӧмъяс. Конгресс дырйи уджалас вит тематическӧй чукӧртчылӧм: «Преемственность в освоении и использовании финно-угорских языков и культур» (Финн-йӧгра кывъясӧн да культураӧн вӧдитчӧмын йитӧдъяс), «Финно-угорское информационное пространство: перспективы развития» (Финн-йӧгра юӧртан ылдӧс: сӧвман туйяс); «Гражданское общество и власть» (Гражданскӧӥ йӧзкотыр да власьт), «Экономика и окружающая среда» (Экономика да гӧгӧртас); «Демографические и миграционные процессы. Старые и новые диаспоры» (Демографическӧй да миграционнӧй процессъяс. Важ да выль диаспораяс).

Сідзжӧ Конгрессӧ пырӧдчысьяс видлаласны войтырлысь тӧдчана мытшӧдъяссӧ восьса чукӧртчылӧмъясын. Лоӧ и бур культурнӧй уджтас. Конгресс восьтігӧн сьылас саами рэп-артист Айлу Валле, петкӧдчасны Лахти карса йӧктан училищеысь томуловлӧн котыр да Лахти карса консерваторияысь камернӧй оркестр. Лӧддза-номъя тӧлысь 15 лунӧ “Метро” клубын сьыласны «Ääninen» котыр, Карелияысь Сантту Карху Айлу Валле. Лӧддза-номъя тӧлысь 16 лунӧ карса шӧр изэрд вылын лоӧ флеш-моб да петкӧдчасны финн-йӧгра коллективъяс. Тайӧ лунӧ жӧ 19:30 часӧ Конгресса пырӧдчысьяслы да Лахтиса олысьяслы концерт петкӧдлас Лахтиса Симфоническӧӥ оркестр.

Лӧддза-номъя тӧлысь 17 лунсянь 18 лунӧдз Сибелиус Керкаын мунас “Лахтиса поэтическӧй марафон” фестиваль. Ставмирса 7 конгресс котыртӧны “Финляндия-Россия” котыр финн ӧтйӧза ӧтувъяскӧд ӧтвылысь. Войтырсикас тшупӧдын кывкутӧ Финн-йӧгра войтырлӧн консультативнӧй комитет. Конгресс сьӧмӧн могмӧдӧ Финляндияса культура да велӧдан министерство.

Историяысь: Воддза Финн-йӧгра конгрессъяс вӧліны: Финн-йӧгра войтырлӧн I ставмирса конгресс Сыктывкарын 1992 воын; Ставмирса II конгресс 1996 воын Будапештын, Венгрия; Ставмирса III конгресс 2000 воын Хельсинкиын, Финляндия; Ставмирса IV конгресс 2004 воын Таллинын, Эстония; V конгресс 2008 воын Ханты-Мансийскын; VI конгресс 2012 воын Шиофокын, Венгрия.

Ссылки

Источники

«VII Всемирный конгресс финно-угорских народов в городе Лахти». Консультативный комитет финно-угорских народов, 14 июня 2016 года. (архив)